早排阿史整蠱秘書妹妹，嚇到佢花容失色，嬲咗成個星期。講開整蠱，好多人都會即刻諗起周星馳嘅電影，但《整蠱專家》入面嘅橋段已經算小兒科。歷史上有個叫來俊臣嘅酷吏，佢嘅「整人」手段多籮籮，呢啲手段仲可以輯錄成一本叫做《羅織經》嘅書，裡面專門講點樣勾心鬥角、羅織罪名、陷害殺人，連武后武則天睇完都自愧不如。

來俊臣係武則天旗下非常有名嘅一個酷吏，佢先後擔任侍御史、左台禦史中丞、司僕少卿等重要職位，靠嘅就係告密同逼供。話說武則天登基之初，朝庭有個「告密」規定，就係會將想告密嘅人送入京，告密屬實嘅仲有獎勵，來俊臣就係靠到處收集情報告密，而慢慢成為武則天嘅心腹。而來俊臣擅長逼供，呢個技能亦被武則天利用嚟剷除異己。

來俊臣其中一個最出名嘅逼供手法就係「請君入甕」，即係將個犯人擺入個大缸度，然後用火燒大缸。不過呢個方法原本就唔係來俊臣發明嘅，而係同係酷吏嘅周興所創，後嚟來俊臣用返周興呢個絕招對付周興，於是有咗「請君入甕」呢個成語。來俊臣做酷吏期間，得罪人多稱呼人少，最後因得罪武則天個女太平公主，被斬首棄市。好多對來俊臣恨之入骨嘅人連佢嘅屍首都唔放過，挖佢對眼、剝佢層皮、劏佢個肚，相當慘烈。

圖為武則天、來俊臣劇照，原圖嚟自網絡。